O Estadio de Espiñedo acolleu este mércores a presentación oficial dos novos xogadores da primeira plantilla do CD Arenteiro. Gorka, Aguza, William De Camargo e Diego Moreno posaron cos seus novos cores, acompañados polo director deportivo da entidade, Joan Farías.
O responsable deportivo quixo subliñar a importancia destas incorporacións para o proxecto verde:
“Hoxe presentamos xogadores que nos darán un salto na categoría. Diego Moreno é un xogador de futuro, vén do Valladolid e Valencia con bo resultado. É veloz e aporta moito desborde. Aguza achegaranos a súa gran experiencia para dar equilibrio ao equipo e poso no xogo. Gorka é un xogador contrastado, que nos dará seguridade e forza na defensa. E William, un vello coñecido, do que agardamos moitas alegrías”, destacou Farías.
O director deportivo tamén fixo referencia ao proceso de configuración do equipo:
“Aquí vimos a traballar. As decisións tómanse en conxunto entre o adestrador, eu e os equipos de traballo. O club está por enriba de todos e temos que respectalo, así como á nosa afección. No mercado sempre hai movementos de entradas e saídas, é o lóxico. A crítica enténdese, os resultados marcan a diferenza, e o primeiro que temos que conseguir é que isto funcione no deportivo”.
As primeiras palabras dos protagonistas
Cada un dos futbolistas tamén tomou a palabra para compartir as súas primeiras impresións como xogadores do Arenteiro:
- Diego Moreno: “Esperamos gozar moito do equipo. Temos un bo grupo de xente que xa sabe o que é competir nesta categoría. Veño a traballar, a aportar todo o que poida e a ser un compañeiro máis para todo o que se precise de min”.
- Aguza: “Veño a aportar equilibrio e experiencia. A sumar no grupo e a axudar tamén aos máis novos a adaptarse. Puiden aprender en moitos equipos e creo que podo engadir cousas ao bloque. A idea é seguir traballando e medrando, igualando e mellorando os últimos anos do club na categoría”.
- Gorka: “Quero aportar experiencia. Levo varias tempadas nesta categoría, vivín de todo e penso que podemos dar un paso adiante. Quero recuperar sensacións, mellorar respecto ao ano pasado e facer un bloque sólido canto antes. Será un ano moi igualado e o esforzo non vai faltar”.
- William De Camargo: “Veño a aportar sempre. É un grupo san, con xente de calidade, e penso que podemos acadar cousas importantes. As primeiras sensacións son moi boas e teño moitas ganas de axudar co meu xogo ao equipo”.
Coa presentación destes catro reforzos, o CD Arenteiro segue a dar forma a un plantel que afronta con ilusión e ambición a nova tempada.
