Derrota na casa pola mínima fronte á SD Ponferradina no último encontro da campaña en O Espiñedo.

O encontro entre o CD Arenteiro e a SD Ponferradina baixaba o pano á tempada oficial en O Espiñedo nun duelo intenso e equilibrado desde os primeiros compases. Os de Juanfran García saltaban ao verde cun sistema de tres centrais, Jordan e Moreno como carrileiros e coa novidade de Chuca na punta de ataque. Primeira metade con alternativas para ambos conxuntos e cun equipo verde decidido a brindarlle unha última alegría á súa afección diante da casa.

O partido transcorría con chegadas repartidas e cun ritmo elevado, no que os locais trataban de sorprender mediante incorporacións por bandas e conducións cara campo rival. Bo traballo colectivo dos dous bloques, con máxima intensidade tamén por parte da SD Ponferradina, que buscaba consolidar a súa posición na zona alta da clasificación.

Os de Carballiño adiantaban liñas co obxectivo de acumular efectivos en zona de remate, mantendo ao mesmo tempo o equilibrio defensivo fronte ás acometidas bercianas, que tiñan en Slavy e Calderón as súas principais referencias ofensivas. Cun par de aproximacións perigosas para cada equipo, a ocasión máis clara da primeira metade sería visitante, cun lanzamento de falta de Andoni desde a frontal que Alvin desviaba a córner cunha intervención de enorme mérito.

A segunda metade mantivo o ritmo e as sensacións vistas anteriormente. Velocidade no xogo e un CD Arenteiro máis esixido en tarefas defensivas para frear un rival que progresivamente gañaba metros en campo contrario. O traballo dos bercianos acabaría atopando premio co tanto de Slavy, que aproveitaba unha acción ofensiva para adiantar á SD Ponferradina e confirmar o bo momento do cadro visitante.

O tramo final do encontro estivo marcado polos numerosos cambios introducidos por ambos equipos. Dani, Adilson, Molina e Bastida ingresaban no terreo de xogo para achegar refresco e enerxía a un bloque que o intentou ata o final, sen fortuna nas accións ofensivas. Pese ao esforzo e ao apoio constante da bancada de O Espiñedo, o marcador xa non se movería e a tempada na casa pechábase cunha derrota pola mínima.