O CD Arenteiro abriu este mediodía unha nova etapa coa presentación oficial de Jorge Cuesta como máximo responsable do primeiro equipo. Ás 13:00 horas, na sala de prensa de Espiñedo, o técnico vigués asinou o primeiro acto da súa chegada acompañado polo director deportivo, Joan Farías, nunha comparecencia que transmitiu ilusión, autocrítica e unha mensaxe clara: volver á esencia verde.

Un cambio necesario para recuperar o rumbo

Joan Farías foi o encargado de introducir a presentación, deixando claro que a decisión responde á necesidade de darlle un xiro á dinámica actual.
“Temos moita ilusión coa chegada do míster. É a persoa que necesitabamos”, afirmou con contundencia antes de explicar o contexto: “O cambio era preciso. O feito anteriormente está aí e seguro que axudou, pero agora toca saír de aí abaixo”.

O director deportivo destacou a sintonía inmediata entre ambas partes e puxo en valor o perfil de Cuesta: “É un adestrador que funcionou, que medrou aquí, e con quen o club xa se identificou no pasado con figuras semellantes”. Ademais, recalcou a aposta por un estilo máis atrevido: “Buscabamos ser máis valentes. Este equipo ten un perfil ofensivo, e Jorge chega con fame e cunha excelente escola”.

Cuesta: gratitude, identidade e ambición

O novo responsable do banco verde tomou a palabra cun ton sincero e decidido.
“Estou agradecido ao club pola oportunidade. É a maior que tiven como adestrador”, comezou, antes de subliñar o valor simbólico que ten o Arenteiro no fútbol galego: “Para todos nós, este é un club entrañable, que puxo Carballiño no mapa. A xente fala ben deste escudo, e iso marca”.

Cuesta recoñeceu a situación do equipo, pero tamén a súa confianza no grupo:
“Non estamos nun momento irreversible nin moito menos. Eles coñecen o seu nivel e saben que non están lonxe dos puntos”.
O novo míster amosou unha mensaxe firme: hai equipo para competir, pero é preciso cambiar o chip.

A identidade como punto de partida

Se houbo unha idea repetida con forza foi a de recuperar a esencia do Arenteiro.
“Queremos recuperar a identidade do Arenteiro e de Espiñedo”, proclamou, deixando claro o tipo de equipo que pretende construír: “Queremos ser dominadores, combinativos e profundos. Un equipo rápido, con personalidade, que siga a liña que gustou tanto tempo aquí”.

O adestrador puxo o foco na produción ofensiva como unha das claves a mellorar:
“O equipo competiu ben e creo que debería levar máis puntos. Pero hai que xerar máis ocasións. Desde fóra dá a sensación de que ás veces se perde un pouco a fe cando non se crea perigo”.

A importancia de Espiñedo e do factor casa

Cuesta tamén destacou o valor de xogar en Espiñedo e o que o campo pode ofrecer ao equipo:
“Estamos nun campo grande para aproveitar aos nosos xogadores. Ser locais debe achegarnos á vitoria”.

O vigués non escondeu a esixencia do próximo reto ligueiro, pero mostrou ambición:
“O rival chega nunha boa dinámica, pero separámonos por poucos puntos. A categoría é igualadísima, e imos competir a calquera”.

Un punto de inflexión necesario

A presentación rematou cunha mensaxe clara tanto para afección como para o propio vestiario:
“Queremos conseguir obxectivos. A identidade é importante, pero temos que sumar. Non podemos facernos pequenos; se melloramos a chegada, mellorará o gol”.

O Arenteiro inicia así unha etapa marcada pola ilusión, pola vontade de reconectar co estilo que definiu os seus mellores momentos recentes e polo convencemento de que hai tempo e talento para cambiar o rumbo.