Arribas: “Temos que contaxiar á nosa xente coa forza do equipo”

O CD Arenteiro recibe esta fin de semana ao Barakaldo CF nun dos encontros máis atractivos da xornada. O bloque de Carballiño buscará recuperar a senda da vitoria diante da súa afección, nun partido que se prevé igualado e de moita intensidade. O adestrador, Jesús Arribas, compartiu as súas impresións en rolda de prensa e destacou a importancia de combinar atención, fiabilidade e paixón para lograr un triunfo clave.

“A semana de traballo foi moi boa, os xogadores viñan con ganas de reivindicarse. O partido da pasada semana estivo ben plantexado, pero isto é fútbol. O equipo está doído polo resultado”, recoñeceu o técnico, que engadiu:

“Os detalles inclinan a balanza, e queremos volver á vitoria na nosa casa, tendo en conta todo o que nos faltou”.

Arribas incidiu na actitude positiva do grupo:

“O equipo descansou, chegou con enerxía e realizou unha semana forte. Vexo ao grupo ben, con moi boa disposición de cara ao domingo. Diante da nosa xente temos que ser protagonistas e ofrecer o mellor á afección. Queremos contaxiar entusiasmo e forza para gañar”.

Do rival, o Barakaldo, destacou a súa experiencia e solidez:

“É un equipo feito á categoría, cunha identidade clara. Levan moitas tempadas co mesmo modelo de xogo e un bloque que se coñece moi ben. Acumulan varios ascensos en pouco tempo. Temos que minimizar as súas virtudes porque poden ser verticais, combinativos ou manexarse en distintas alturas”.

En canto ao plan de partido, o técnico teno claro:

“Os encontros nesta categoría son moi igualados, todo se decide por moi pouco. O traballo dará os seus froitos. Queremos ser ofensivos, levar a voz cantante e facer que os nosos xogadores sexan protagonistas nos partidos da casa”.

Arribas tamén fixo referencia ás baixas e ao estado físico da plantilla:

“Recuperamos a Lluis, pero non contamos con Sergio, Jaume nin Nacho. Estamos traballando a tope e os servizos médicos fan un gran esforzo para recuperar aos lesionados. O resto está dispoñible”.

O adestrador anticipa un choque longo e esixente:

“Agardamos un partido duro, o rival vai poñer dificultades. Debemos ter os cinco sentidos postos para que non nos sorprendan. O balón parado pode ser clave de novo, xa o foi na primeira xornada e aprendemos diso”.

Finalmente, Arribas deixou unha mensaxe clara para a afección verde:

“Só pensamos no noso equipo. Hai que enganchar á xente, non chega con boas sensacións: hai que sumar de tres. O resultado será consecuencia do traballo que realicemos sobre o verde”.

O Arenteiro afronta así unha cita importante en Espiñedo, coa oportunidade de reafirmar o seu camiño diante dun dos rivais máis sólidos da categoría.