O vindeiro mércores 8 de outubro ás 20:00 horas, o fútbol galego volve demostrar a súa forza unida coa iniciativa «Xuntos contra o lume». O RC Celta e a Selección de Ourense enfrontaranse no Abanca Balaídos nun encontro que vai máis alá do deportivo: todo o recadado irá destinado a proxectos de reforestación na provincia de Ourense, unha das zonas máis castigadas polos incendios nos últimos anos.

Entradas solidarias e Fila 0

As entradas teñen un prezo único de 10 € e estarán dispoñibles desde o luns 15 de setembro ás 12:00h. en celta.gal. Importante: neste partido non será válido o Carné Celtista Abonado.

Para quen non poida asistir pero queira colaborar, habilitarase unha Fila 0 e unha conta bancaria para doazóns.

Camisetas especiais e subasta solidaria

Neste encontro, ningún dos dous equipos vestirá a súa equipación habitual: lucirán camisetas deseñadas especialmente para a ocasión, que tamén estarán á venda na tenda oficial do club.

Unha vez finalizado o partido, as camisetas empregadas polos xogadores serán asinadas e subastadas, co obxectivo de aumentar a recadación.

Unha causa común: devolverlle a vida aos montes

O 100% dos fondos recadados destinarase a proxectos de reforestación en Ourense, co obxectivo de devolverlle o verde e a vida aos montes queimados polas lapas.

Retransmisión en aberto

O encontro poderá seguirse en directo a través do canle de YouTube do RC Celta e tamén pola TVG, permitindo que toda Galicia se una á causa.

Unímonos no campo para volver pintar de verde a nosa provincia.