O Arenteiro afronta este sábado unha saída esixente a El Toralín para medirse á SD Ponferradina. Na previa, Jorge Cuesta trasladou unha mensaxe de crecemento e estabilidade, reflectindo a boa dinámica emocional e futbolística que está a vivir o equipo nas últimas semanas.

Mellores sensacións e maior confianza

O técnico comezou destacando o estado do grupo:
“As sensacións son moito mellores. Non só no ánimo. Esa enerxía é máis evidente cun resultado positivo”.

A victoria recente serviu para reforzar conviccións:
“Confianza, crer no que estás facendo… O día a día xa era bo, pero o resultado anímanos a seguir propoñendo o plan de partido”.

Segundo Cuesta, o equipo chega máis asentado:
“Máis tranquilos, máis concentrados… Está claro que o resultado suma para todo”.

O apoio da afección e o escenario de El Toralín

O preparador tamén fixo referencia á masa social verde:
“Agardamos xente apoiando ao equipo en Ponferrada. Todo o que sexa sentir á nosa afección será positivo”.

E sinalou o atractivo dun estadio histórico:
“Son campos que che dan un plus de motivación, achégante ao fútbol profesional”.

Baixas e dispoñibles

No capítulo deportivo, Cuesta fixo balance da situación física do cadro:
“Richarte segue con molestias. Jordan, Aguza, Gorka e Nacho continúan cos seus procesos de recuperación. Romera está dispoñible”.

Un rival esixente e en proceso de cambio

A Ponferradina preséntase como un adversario competitivo:
“Teñen un equipo para estar pelexando polo play-off. Son agresivos, meten moita xente na área. Co cambio de adestrador, veremos seguramente variacións”.

O míster espera un encontro intenso:
“Medímonos a un rival duro nos duelos, e talentoso co balón e en ataque”.
Tamén prevé probas e axustes propios dun novo ciclo técnico:
“Veremos as modificacións lóxicas cando hai un cambio no banco”.

Pechar o ano en positivo

Cuesta confía en que o equipo poida prolongar a boa liña:
“Agardamos que rematar o ano en positivo xere unha ilusión importante no grupo”.
Sinala que a tendencia actual é positiva e que o equipo debe aproveitala:
“Vendo como estabamos, e as posibilidades de reverter un pouco a situación, temos que ir a por todas”.

A importancia dos duelos directos tamén estivo presente:
“Os equipos que marcan o descenso son rivais directos para sumar”.

Mirando ao futuro inmediato:
“Quedan encontros importantes que preceden a unha segunda volta clave para os intereses do equipo”.

A mellor versión está preto

O técnico non oculta que o camiño non foi doado:
“Estabamos nunha situación complicada, e seguimos nela, pero as sensacións están cambiando e iso repercute en todo o demais”.

E mantén a ambición intacta:
“Estamos lonxe do obxectivo principal, pero estamos no camiño, a tempo de conseguir os resultados desexados para achegarnos á salvación”.

Sobre a importancia do duelo, foi claro:
“Vai ser un partido importante, aínda que para min o da semana pasada era máis clave. Con todo, imos buscar os tres puntos como sempre”.

Cuesta concluíu cunha valoración que define o momento do equipo:
“Hai moito mellor equipo do que indica a clasificación. Estamos atopando o camiño máis efectivo posible. Seguiremos facendo cambios e consolidando o bloque se a cousa segue funcionando ben”.