A sala de prensa do Estadio de Espiñedo acolleu esta mañá a presentación oficial dos novos xogadores do CD Arenteiro: Llácer, Eliseo Falcón, Dani González e Brais Val. Acompañados polo Director Deportivo, Joan Farías, os catro futbolistas transmitiron ilusión, compromiso e ambición de cara a unha nova tempada cargada de retos.

Brais Val: volta á casa e ilusión por medrar

Tras unha etapa complicada, Brais regresa a Galicia coa ilusión de formar parte dun proxecto sólido e en crecemento:

“Cando se dá a posibilidade de volver a casa despois dun ano difícil, e nun equipo que o fai tan ben como o Arenteiro, é algo que me ilusiona moito.”

O xogador salientou a importancia do traballo colectivo e a clara liña de traballo que marca o corpo técnico:

“O míster busca potenciar o colectivo desde o individual. Hai unhas directrices claras e o proxecto transmite ambición e orde.”

Brais destacou tamén a aposta polos xogadores novos e prometeu esforzo:

“Vexo moita calidade na xente nova, queremos facer un bo ano como equipo e medrar tamén a nivel individual. Tentarei axudar en todo o que poida e ofrecer o mellor do meu xogo.”

Dani González: saír da zona de confort e medrar

Dani chega ao Arenteiro decidido a dar un paso adiante na súa carreira:

“Estou mentalizado de saír da zona de confort. Creo que era o paso que debía dar.”

Describiuse como un xogador polivalente no medio campo e con vocación ofensiva:

“Adáptome ben a calquera posición no centro do campo. O gol sempre estivo aí, o ano pasado fixen moitos e espero poder sumar tamén aquí.”

O seu compromiso é claro:

“Veño para traballar e implicarme ao máximo. Quero medrar da man do equipo.”

Llácer: identidade, ambición e compromiso defensivo

O defensa destacou a progresión do club e o bo facer como vía de crecemento individual:

“Aquí, quen o fai ben, ten oportunidade de subir.”

Llàcer mantén intacta a ambición persoal e colectiva de cara a esta nova tempada:

“Este ano seguiremos coa mesma liña. Non renunciaremos a nada e buscaremos cumprir o obxectivo canto antes.”

Descríbese como un defensor con vocación ofensiva, sempre disposto a sumar en todas as facetas do xogo:

“Encántame sumarme ao ataque sen esquecer a nosa función defensiva. Quero achegar en todas as facetas do xogo.”

E remata cunha mensaxe clara sobre o espírito co que afrontan o novo curso:

“Queremos construír un bloque forte desde o inicio, cunha identidade clara e moita ambición desde o primeiro partido.”

Eliseo Falcón: experiencia e compromiso nun proxecto sólido

Eliseo mostrouse convencido da súa elección:

“A proposta foi ambiciosa desde o principio. Creo que chegar aquí foi unha gran decisión.”

Coa súa experiencia, Eliseo aspira a ser unha peza clave na liña defensiva do equipo:

“Considérome un bo defensor de área e creo que podo achegar desde a experiencia.”

Mostra plena confianza no potencial do proxecto:

“A idea do equipo, do club e da xente fixo que esta opción sexa perfecta para seguir medrando.”

E lanza unha mensaxe clara sobre o nivel da categoría e o compromiso do vestiario:

“Esperamos unha categoría moi dura, pero estaremos preparados para competir contra calquera.”

Joan Farías: estabilidade, planificación e ollada no mercado

O Director Deportivo mostrouse confiado co traballo realizado ata o de agora:

“Estamos tranquilos, estamos traballando para pulir moitas cousas.”

O director deportivo deixou claro que o club continúa moi presente no mercado:

“Mentres o mercado estea aberto, estou no mercado.”

Tamén explicou a importancia da pretempada para construír un bloque competitivo:

“Xa contamos cun equipo amplo. Hai outros equipos con moitos menos xogadores.”

Sobre nomes propios, referiuse ao salto de Alpha e á planificación da portería:

“Alpha deu un salto de categoría, agora depende del que a súa chegada sexa proveitosa.”
“A miña idea é ter tres porteiros, hai que estar preparados para todo.”

E concluíu con determinación:

“Seguiremos traballando para pechar o equipo segundo o plan trazado.”

Podes ver a presentación completa na nosa canle de Youtube: