O CD Arenteiro sumou un punto de moito valor no feudo do Pontevedra CF, nun encontro esixente e de alta intensidade, marcado polo golazo de Jordan Sánchez e por unha segunda metade con constantes ocasións en ambas áreas.
Os de Jorge Cuesta chegaban a Pasarón coa intención de competir e pelexar polos puntos ante un dos equipos máis en forma da categoría. O Arenteiro saltaba ao céspede cun once de garantías, apostando polo traballo colectivo e polo control do xogo nun escenario sempre complexo como o estadio granate. Os primeiros minutos foron de dominio verde, cunha presión alta que dificultaba a saída de balón do rival e con boas aproximacións ofensivas, destacando unha ocasión de Mingo tras centro cruzado que non atopou rematador por escasos centímetros.
O equipo de Carballiño buscaba facer dano polas bandas, onde se mostraba sólido e profundo, fronte a un Pontevedra máis reactivo, á espera de erros para lanzar as súas transicións. A lesión de Llàcer obrigou a Cuesta a introducir cambios na estrutura, dando entrada a Daniel González para reforzar o traballo polo flanco esquerdo. O esforzo tivo recompensa co gol de Jordan Sánchez, que asinou un auténtico golazo de falta directa para adiantar aos verdes no marcador. Porén, cando o descanso xa asomaba, o Pontevedra lograba o empate cun tanto de Emil, que aproveitaba un envío á área para igualar o encontro.
A segunda parte comezou cun Arenteiro levando a iniciativa, converténdose no principal animador dun partido que foi gañando ritmo e carácter de ida e volta co paso dos minutos. O xogo tornouse máis aberto, con ambos conxuntos buscando a amplitude e os espazos nun duelo de poder a poder. Mingo dispuxo dunha ocasión clara, ademais de dúas contras ben conducidas polos visitantes que puideron significar o segundo tanto, pero faltou acerto na finalización.
Co avance do encontro, Cuesta introduciu pernas frescas coa entrada de Julen Jon e Alpha, mantendo o nivel de intensidade, sacrificio e ambición do bloque. O partido acabou converténdose nun intercambio constante de contragolpes, nos que o Arenteiro amosou personalidade e capacidade competitiva, aínda que sen fortuna diante da portería rival.
Tras os noventa minutos, o empate repartiu un punto para cada equipo nun choque moi disputado, deixando boas sensacións no conxunto verde pola súa entrega e rendemento nun campo de máxima esixencia.
