O CD Arenteiro caeu por 0-2 no choque ante o Ourense CF, nun encontro decidido polos goles de Castillo e Muñoz
O derbi ourensán arrincaba con máximas pulsacións e igualdade desde os primeiros compases. O once inicial de Jorge Cuesta presentaba varias novidades, con Dani González, Eliseo e Cuéllar entre as incorporacións para medirse a un dos equipos máis en forma da categoría. O partido comezaba eléctrico, con chegadas perigosas en ambas áreas e cun tanto inicial de Luca Lohr que adiantaba momentaneamente ao Arenteiro, pero que sería anulado polo árbitro nunha decisión moi discutida. As sensacións eran favorables ao cadro local, que gozaba de maior posesión e conectaba as mellores combinacións ofensivas. As aparicións de Mingo ao espazo, xunto ao perigo constante de Ferreiro e Cuéllar polos costados, puxeron en alerta a un Ourense CF ben organizado, que atopaba en Amín e Omar as súas principais vías de avance.
A primeira metade foi de ida e volta, cun rival que foi medrando en circulación e manexo de balón, apoiándose na velocidade dos seus homes máis ofensivos. Reparto de protagonismo no xogo, e un CD Arenteiro moi concentrado na fase defensiva para conter o empuxe dun rival intenso e traballador. A loita polos espazos na medular e nos duelos individuais polos costados marcaba o pulso dun partido con dous bloques sólidos, ambos buscando superioridades e mellores posicións de chegada. Con varios remates a centros laterais, o Ourense CF obrigou ao equipo verde a espremerse para manter o empate ao descanso nunha primeira parte esixente e equilibrada.
A segunda metade comezaría con malas novas para o CD Arenteiro. Un gran disparo de Nacho Castillo desde a frontal convertíase no 0-1 e poñía por diante ao Ourense CF. O gol sentou como un golpe para os verdes, que nos seguintes minutos sufriron novas aproximacións perigosas dun rival que incrementaba a súa presión, obrigando á zaga e ao gardameta a responder con acerto. Chegaban momentos de alta esixencia, e Julen Jon, Moreno e Ochoa entraban ao terreo de xogo para reforzar o empuxe ofensivo e buscar o empate.
O tramo final deixou ocasións para ambos equipos. Primeiro, un remate ao traveseiro do Ourense CF; despois, a oportunidade máis clara dos locais cun cabezazo de Ochoa que se marchou fóra por centímetros. O Arenteiro aumentaba o ritmo, melloraba a circulación e atopaba máis profundidade pola banda esquerda, acumulando xogadores en área rival e adaptando a estrutura ofensiva para xerar máis pases e chegada. Pero a recompensa non chegou. No epílogo do encontro, Muñoz facía o 0-2 e sentenciaba un choque no que os de Cuesta mereceron mellor sorte.
