O CD Arenteiro caeu por un gol a cero fronte ao CD Tenerife nun partido no que os homes de Jorge Cuesta mereceron máis.

O Club Deportivo Arenteiro visitaba o Heliodoro Rodríguez López coa misión de loitar pola suma de puntos ante o gran favorito ao ascenso. Jorge Cuesta presentaba un once de garantías con algunhas modificacións salientables, como a entrada e debut oficial de Alvin Abajas baixo paus. O encontro comezou igualado e esixente, con Aitor Sanz e Nacho Gil poñendo a proba desde o inicio a solvencia e seguridade da zaga verde. Para combater o potencial tinerfeño, os carballiñeses adiantaban un bloque compacto, rigoroso no peche de espazos en campo rival e coa intención de roubar e xerar chegadas rápidas.

Co paso dos minutos, os verdes ofrecían unha imaxe seria, de traballo constante e equilibrio, buscando opcións en ataque e tentando sacar proveito da amplitude do campo. Malia ao esforzo e ao bo nivel mostrado, serían os locais quen tomasen vantaxe ao fío do descanso: un balón parado desde a dereita era rematado de cabeza por Fabricio, que enviaba o esférico ao fondo da rede para facer o 1-0.

A segunda metade mantivo o guión dun Arenteiro firme, que non baixaba os brazos e seguía impulsado polo orden e a fe no plan de xogo. As chegadas á área rival producíanse especialmente polos costados, con Jaume Cuéllar e William como referencias exteriores, acompañados polo incansable Mingo en punta.

As sensacións eran positivas e os achegamentos máis frecuentes, pero a fortuna non acompañou nos metros finais para alterar o marcador. O elevado nivel de esixencia deu paso a cambios en ambos equipos: Balde e Mesa entraban nos locais, mentres que Moya debutaba co Arenteiro. O cadro de Cuesta mantívose ambicioso na procura do empate, un premio que, pese aos intentos, non acabou chegando.

A derrota, pola mínima, castigou a un equipo ao que só un detalle separou da recompensa dos puntos.