O CD Arenteiro afronta unha das saídas máis esixentes do curso coa visita ao CD Tenerife, líder e principal candidato ao ascenso. Na previa do encontro, Jorge Cuesta analizaba ante os medios a evolución da semana e o plan para competir nun duelo que esixirá precisión, calma e intensidade a partes iguais.

Unha semana de traballo completa e axustando detalles

O preparador galego valorou positivamente o ritmo das sesións:
“A semana foi ben. Semana máis normal de traballo e longa. É verdade que o rival condiciona máis á hora de expor un partido con conceptos dominantes”.

O corpo técnico dedicou os últimos días a afinar comportamentos e ferramentas:
“Estamos aproveitando para axustar situacións, comportamentos e ferramentas. Temos claro o que queremos en todas as fases do xogo”.

O reto de ser eficaces ante un rival moi ofensivo

Cuesta foi directo ao analizar os datos que manexa o equipo:
“En canto a números, os nosos din que estamos a faltar de gol, aínda que non encaixemos moito. Eles anotan moito e deféndense moi ben. Hai que conceder pouco e tratar de imitar a equipos que alí sacaron rédito”.

O técnico espera un partido contundente desde o primeiro minuto:
“Veremos un partido de ritmo alto, 90 minutos de tensión. Son moi verticais, meten moita xente na última zona, moitas situacións de un contra un… Podemos puntuar sen ser dominadores”.

Para Cuesta, unha das claves será saber aproveitar os momentos favorables:
“Sabemos que temos que aproveitar momentos e ocasións, tramos nos que esteamos máis cómodos para conseguir o premio dos puntos”.

Liberarse da presión e xogar con cabeza

O adestrador lembrou que o momento esixe personalidade e unidade:
“O equipo ten ganas de seguir medrando e mellorando, somos conscientes do que precisamos neste momento”.

Tamén fixo fincapé no factor emocional:
“Ata o minuto noventa temos que estar xuntos, aproveitar a presión que teñen. Temos que usar as situacións nas que somos fortes, liberando ao equipo da tensión que leva enriba”.

Baixas, sancións e oportunidades

O técnico confirmou que non hai novidades no apartado físico:
“Non recuperamos aos tocados, estamos á espera de probas e sensacións. As sancións tamén restan efectivos, pero é unha oportunidade para o resto”.

Sobre Aguza, engadiu:
“Está pendente de probas e valoracións para coñecer a súa situación”.

Un Tenerife en gran momento e con moitas variantes

Cuesta destacou o potencial ofensivo do rival:
“O CD Tenerife é un equipo con capacidade ofensiva alta, xera moito con pouco”.

Tamén analizou o contexto competitivo insular:
“Entendemos que as nosas posibilidades pasan por ser capaces de adaptarnos con capacidade e velocidade a un contexto de partido de alto ritmo”.

E advertiu sobre posibles rotacións pola Copa:
“Xogan Copa e pode que entren rotacións, pero é un gran equipo con multitude de alternativas en ataque e defensa”.